بسم الله نبدأ
في هذه السلسلة راح اتكلم عن:
"كيف تبدأ في مجال الروبوت؟"
لكي نعطي الموضوع حقه لازم تعرف ان مجال الروبوت واسع وبحر من العلوم والتخصصات.
وتجيني استفسارات كثيرة بهذا الخصوص ... الحقيقة اجاوب على كل استفسار بجواب مختلف لأن كل شخص وله حالته الخاصة والاهم ماهي اهدافه
مااقدر أقول لواحد طالب بالجامعة انه يتعلم من حقيبة تعليمية تناسب الأطفال والمراهقين اكثر
لذلك...
الموضوع عشان يخلص يحتاج على الأقل سنة عشان افيدكم بشكل صحيح ...
لكن باقتراح البعض ان نبدأ من البداية ونكمل
لذلك فكرو فيها انها على أجزاء وكل جزء نغطيه في شهر مثلاً
والجزء حق هذا الشهر بيكون عن بداية الطريق لمن أراد الدخول لهذا العالم الجميل واسأل الله ان يكتب فيه الفائدة للجميع ويكون بداية لقصص نجاح في الروبوت في العالم العربي
سؤالنا الذي حير الأصدقاء والمتابعين كثيراً "كيف تبدأ في مجال الروبوت؟"
قبل مانجاوب على السؤال (اسف ولكن خلك صابر وفي مجال الروبوت قد ماهو ممتع ورائع الا انك لازم تصبر) خلونا نتفق على عدة أمور .
اولاً اخوكم إبراهيم روبوت ماهو الا متعلم مثلكم واتعلم يومياً ولازلت اتعلم ... ومااكتبه بحسابي هو بحسب خبرتي وتجربتي التي تختلف عن تجربة أي شخص اخر.
واكيد تحتمل الخطأ لذلك أتمنى منكم المتابعة ومن لديه سؤال او اقتراح او تصحيح ياليت تكرما يساعدنا لاثراء التغريدات ...
ثانياً لو ذكرت في هذه التغريدات أي جهة او شركة فهي من باب اعطائكم الخيارات في السعودية او برى السعودية شرائك منهم على مسؤوليتك الخاصة ...
ثالثاً وهو الأهم التغريدات لاتغنيك ابداً عن أي كتاب او دورة تدريبية ودورك هو البحث واستخدام هذه المعلومات في البحث وإيجاد الخيار الأمثل لك ...
واحاول قدر الإمكان وضع الطرق المختلفة لتصل "لهدفك" .. ونبدأ من هذا المنطلق في التغريدة التالية:
اول خطوة في موضوع "كيف تبدأ في مجال الروبوت" هي:
ماهو هدفك ؟
معرفتك لهدفك تسهل عليك كثير وتوفر عليك فلوس ووقت ...
وهنا خليني افصل لكم بحسب توقعي وبحسب مايصلني من استشارات لمختلف الناس بعدة اهداف مختلفة واجابات مختصرة لكل هدف.
1-معلومات عامة: ابحث ب قوقل واليوتيوب عن كل روبوت تسمع عنه او تشوفه واقرأ اكثر اتعمق في كل شي يشد اهتمامك ... استخدم كلمات مفتاحية في البحث تساعدك مثلا
Robot, mobile robot, bioinspired robot, legs robot, soft robot, medical, automated, drones, UAV, UGV …etc
او ادمج مابينهم
هنا لازم تنتبه لشي مهم جداً وخطأ يقع فيه اغلب الناس ومن ضمنهم انا ... وهي الروبوتات الوهمية ...
انتشر مقطع لروبوتات وهمية في كل مواقع التواصل وهو مفبرك من قبل فريق مونتاج
اسأل سؤال في كل روبوت تشوفه.
هل هذا حقيقي ام خيال ام مونتاج؟
طيب كيف تعرف؟
شوف الروبوت هل له مقالات واخبار من مصادر رسمية وجهات معروفة
هل في اوراق علمية
تصاميم هندسية
صور حقيقية
والاهم هل هو منطقي
لو ماكان عندك خبرة في البحث راح تصعب عليك في البداية لكن افضل طريقة ابحث عن طريق الصور واي صورة تعجبك اضغط عليها راح تلاقي تحتها كلمات مفتاحية مختلفة عن الكلمة اللي حطيتها +
صور لروبوتات متشابهة اضغط على أي شي يعجبك الى ان توصل لشي شدك تتعلم عنه اكثر ادخل على الرابط واقرأ عنه
نكمل السلسلة لاحقاً ... ناخذ بريك
رتبها لو سمحت @Rattibha
الهدف رقم:
2- دراسة وتخصص: نصيحتي لك ركز على احد التخصصات وخليك خبير فيه واحسن واحد بالعالم: ميكانيكا..كهرباء..تخصصات الحاسب.
لكن مهم شغلتين:
الأول انك تسوي مشاريع قد ماتقدر وتركز على مشاريع لها علاقة بالروبوت عشان تتخصص في شي دقيق مثلا:ميكانيكا روبوت (مثل حالتي)
الثاني انك لازم تتعلم ولو معلومات عامة عن باقي تخصصات الروبوت ... وضروري تعرف كيف تتخاطب معاهم ...
مثلا لو تخصص ميكانيك لازم تعرف ايش مشترك بينك وبين الكهرباء وتفهمه مثل المحركات ...
ولو حبيت بعدما تتقن تخصصك انك تدرس عن تخصصات ثانية انت بطل (هذه مرحلتي القادمة) ...
3- حب للروبوت: ابدأ باسهل واصغر روبوت واتعلم عليه حتى لو تحس انه تافه او للصغار المهم تستمتع وكل فترة جرب روبوت جديد او جرب طريقة جديدة للبناء والبرمجة (مهم) ...
وشوية شوية كبر مشاريعك مع الوقت تستمتع وتعتبرها هواية وماتحس الا انك سويت مشاريع خارقة ...
4- مهارة المستقبل: اصبر واشتغل حبة حبة ... وابني خبرتك وتجربتك أيام وشهور وسنين جرب كل شي لو تسوي مشروع واحد لكل نوع...
ابدأ بالمبادئ الاساسية للروبوت وبعدها للتطبيقات ...
تابع الاخبار الجديدة اول باول وفكر دائما في ايش يحتاج العالم
وابحث عن مشاريع عالمية وقلدها باي طريقة ..
5- عندك مشروع تبغى تسويه: ابحث عن مشاريع مشابهة وشوف أي حقيبة او أدوات تم استخدامها وجرب واسأل المتخصصين لو تدفع لواحد فلوس يعمل لك اول مشروع وتشترط عليه يفهمك ايش عمل وكيف ... لازم تتعلم ... ولو لقيت دورة تدريبية اشترط عليه في البداية انك تقدر تسوي المشروع اللي ببالك ...
هنا لازم تنتبه قبل ماتدفع اي ريال تتاكد ان هذه الحقيبة او القطع او الادوات راح تؤدي لك الغرض وابحث عن عدة بدائل وخيارات واكثر من رأي ... السوق ملييييان انواع واشكال مستحيل مشروعك مايضبط الا بحقيبة معينة او باستخدام برنامج معين ...
6- بزنس ودخل إضافي:
شوف انت عندك عدة اهداف قصيرة ومتوسطة وبعيدة.
قصيرة (شهور) ...
اتعلم أي حقيبة تدريبية جاهزة وسوي مشاريع فيها بفلوس للي عنده افكار ويبغى يطبقها ...
اتعلم التصميم ثلاثي الابعاد وسوي مشاريع واطبعها 3D او Laser حسب الطلب
متوسطة (سنة) ... خذ دورات تدريبية في احد المجالات الثلاث : ميكانيك وكهرباء وتخصصات الحاسب
ومارس واكسب خبرة وسمعة وخذ دورات تدريب مدربين ورخصة التدريب ودرب بفلوس بالاضافة لعمل المشاريع
وتقدر تتعلم شي من كل التخصصات تسوي مشاريع بسيطة ...
المدى البعيد (5 سنين) : سوي مشاريع وابني خبرتك وعلمك وكل مشروع مطور عن اللي قبله واستمر عالتحسين المستمر. ولاتكتفي بنوع معين.
كيف تكسب؟ الرزق مفتوح امامك:
عمل مشاريع ... تدريب ... بيع روبوتات ... تاجير روبوتات ... عمل شركة روبوتات ... تقديم استشارات للناس والشركات ...
7- جميع ماسبق: الله يعينك على نفسك واهلك وحالتك مثل حالتي مجنون روبوت كمل السلسلة وراح اعطيك طريق ممكن تمشي فيه ...
لا يوجد تعليقات
أض٠تعليق